जापान प्रवेशमा नेपाललगायत विदेशी नागरिकलाई रोक

पुष १२, काठमाडौं । जापानमा कोरोना भाइरस (कोभिड–१९) को नयाँ प्रकार (भेरियन्ट) भेटिएसँगै सोमबारबाट लागू हुने गरी जापानले नेपाललगायतका मुलुकहरुबाट आउन विदेशी नागरिकलाई मुलुक प्रवेशमा रोक लगाउने निर्णय गरेको छ । 

अहिले लगाइएको प्रतिबन्ध विश्वका अधिकांश मुलुकहरुमा लागू हुने भएको जापानको विदेशमन्त्रालयले बताएको छ । जापानको स्थानीय सञ्चारमाध्यमका अनुसार जापानी नागरिक तथा जपानमा बसोबास गर्ने विदेशीहरुले भने जापानमा आउन पाउनेछन् । तर, उनीहरुले १४ दिन सेल्फ क्वारेन्टिनमा बस्नुपर्ने हुन्छ । 

जापानको टोकियोमा शनिबार कोरोनाको नयाँ भेरियन्टका दुई संक्रमित फेला परेका थिए । उनीहरु बेलायत भ्रमणबाट फर्किएका थिए । यसअघि शुक्रबार पनि बेलायतबाट आएका पाँच जनामा नयाँ भेरियन्टको संक्रमण फेला परेको थियो । 

सबैभन्दा पहिला बेलायतमा कोरोनाको नयाँ भेरियन्ट देखिएको थियो । कोरोनाको नयाँ भेरियन्ट बेलायतमा देखिएसँगै विश्वका ४० भन्दा धेरै मुलुकहरुले बेलायतमाथि रोक लगाइसकेका छन् ।