ओलीले आफ्ना विरोधी पक्षको फोन ट्यापिङ गरेर जासुसी गरेकोः वर्षमान पुन

पुष १५, रोल्पा । प्रधानमन्त्री केपी शर्मा ओलीले सबै नेताहरूको फोन ट्यापिङ र रेकर्डिङ गरेर आफ्ना विरोधीको प्रत्यक्ष जासुसी गरिरहेको आरोप नेकपा नेता तथा पूर्वमन्त्री वर्षमान पुनले लगाएका छन् ।

मंगलबार लिवाङमा संसद् विघटनविरुद्ध नेकपाको दाहाल–नेपाल समूहले आयोजना गरेको विरोधसभामा बोल्दै पुनले प्रधानमन्त्री ओली आफूभन्दा फरक विचार राख्नेविरुद्ध गैरकानुनी तवरमै खनिन थालेको बताए । ‘आज सबै नेताको फोन ट्यापिङ हुन्छ, रेकर्डिङ हुन्छ,’ उनले भने, ‘त्यसैले सबै नेताले आफ्नो कन्फिडेन्सियल कुरा फोनमा र मोबाइलमा गर्नुहुन्न ।’

राष्ट्रिय अनुसन्धान विभागलाई रातारात आफ्नो मातहत राखेको, राजस्व अनुसन्धान आयोग र सम्पत्ति शुद्धीकरण विभागलाई नियन्त्रणमा लिएर सम्पत्ति छानबिन गर्दा तर्साउन थालेको आरोप प्रधानमन्त्री ओलीलाई उनले लगाए । ओलीले पार्टीभित्रका साना विवादका कारण आलीले यति ठुलो कदम चालेको भन्दै अन्तर्राष्ट्रिय गुप्तचर निकायका मानिसको भ्रमण र पूर्वराजासँगको साँठगाँठको चर्चापछि संसद् विघटनको घटना भएको बताए ।

अहिले भइरहेको विरोध कार्यक्रम संसद् विघटनको कदम सच्याउन ‘रिहर्सल’ मात्रै रहेको भन्दै उनले यसपछि कडा कार्यक्रम गर्ने चेतावनी समेत दिए ।